Ti, anonimo letor, sei drio doperar un computador. Ma te sè come sti mostrici i laora? Son skuaxi sicuro ke la risposta sipia "nò". Alora gò fato sta picola sexion tel me logo, par insegnarte un poco sora ste makinete.
Ben, mi gò scominsià a smisiar sù par computadori in 1994, ten kel tempo ke i computadori xera cari, rugni de doperar, pegri fin dir ame, ... La corona saria longota. Ma alora l me maestro me dixea sù: "Va là, va là, ke de ani indrio le robe le xera ben pì pedo."
E co gò studià la storia dei computadori, la gò savesta ke la xera così propia. Ben, l tempo lè ndà avanti, e i computadori xè restai un pò meio de doperar, ma gran meio de doperar ke fin i pì coioni e orbi xè boni de doperarli.
Ti te sì mia un coion, elo vero? Alora dime se te sè smisiar sù pala to makina: Cognositu la BIOS? Setu doperar l Windows senxa l sordo? Setu kuai xè i disketi boni e i rugni? Ben, se te ghè dito "nò" a tute ste domande, te sè poketoto.
Kuà spiegarò un pò de ste robete, ndemo vanti.
Cosa xè un computador?
Un computador xè una makina de proçesar dati. Dati xè kualkuna informaxion ke te sipii bon de meter entro l computador. L laoro del computador lè ricever sta informaxion, e dartine una risposta. L so mestier lè l proçesamento de dati.
Ben, alora tante robe le pol eser ciamae de "computador". Una persona ke riceve numeri e fà conte, xè un computador, una calculatriçe de kuatro operaxion xè un computador, un abaco xè un computador, ... Un computador nol xè sol kee case ke ghemo su par tole.
Ben, ma parlemo un poco de come se fà la computaxion.
Femo la computaxion
Da tempi imemoriai, i omini i proa far le robe pì facile, i proa far depì, e i dopera i so sarvei par catar fora maniere de facilitar la vita. Alora l gà catà fora bestie par giutarlo, l gà trucà le so caxe de legno par kuele de saso, ke l vento nol porta via; l gà inventà de meter l fogo entro na casa de matoni, parkè nol sfumasese la caxa. E sti meioramenti xè ndai vanti finkè se ghemo inventà de far makine par far laoro, e pò dopo par girar in volta, e in ultima, makine par far calcoli.
Vardè kuà na roba: 2 + 3 = 5; 7 + 1 = 8; 6 + 4 = 10; Tute ste conte xè compagne, la so diferenxa xè in tei numeri ke te pianti entro, ke i se ne dà risultati diversi. Ben, e se ghesimo na makina ke la savese far la conta, e sol ghe piantesimo entro i numeri e la se ne dese l risultato?
Lè stà con kuesta domanda ke i primi matunghi i se gà inventà de far makine ke fà conte. Lè come darghene fien a na vaca, te ghe dè fien, la fà late, noantri ghe demo numari al computador, e l se dà risposte.
I computadori ke ghemo ncoi, noi xè pì ke makine de maxenar numeri, ke le maxena numeri in una kuantità così granda, ke l laoro ke un computador lè bon de far in un per de menuti, ghe ciaparia ani de laoro a na persona.
Ben, ma come ste makine le maxena numeri? Se vedo roba scrita, dixegni, voce? Ben, tute ste robe xè stae ridue a numari entro l computador, la risposta ke l te dà la pol parer altre robe, ma tea fin, i xè numeri.
Ma come far una makina ke la proçese numeri?
In tel scominsio dea storia dea computaxion, la gente gà proà far computadori mecaniki, ma i xera pegri, grandi, i se guastea, alora un kalke matungo gà bio sta idea: E se doparesimo eletricità par far laorar un computador, nò un motor par parar na calculatriçe mecanica, ma un computador fato ke l proçese segnai eletreghi?
Dopo un per de proade i xè stai boni de far un computador laorar a valvole eletreghe.
La roba xera un pò semplice: Una valvola la gà un punto par ndar entro (eletricità ke entra), un comando (verder e serar), e un punto par vegner fora (eletricità ke vai).
Adeso, caro letor, se pikesimo na mucia de valvole insieme, una verdi o sera nantra, o nantre due, o nantre trè. E pò, polarisimo meter valvole insieme parke le laorese in harmonia. Catitu ke dea idea?
Cosita lè stà l scominsio dei computadori moderni, e i sti mostrici i laora così fin ncoi. Entro la to makina, gà de eserghene un per de milioni de valvolete, ke le sera e verda presto come un lampo, e le fà tute le bele robe ke la to makina pol far: scriver, leder un e-mail, far conte, dugar, ...
Nè sempre i computadori xè stai così, da ani indrio, sol l goerno e gente de tanti soldi i polea verli, parkè i xera grandi, rugni de doperar, e i guastea un tefulmine de luce.
L primo computador fato pal popolo, l ghea 8.000 valvolete (o transistori, come ciamemo ste valvolete). I primi Pentium i xè rivai a 5.000.000 de transistor, e l Pentium 4 gà depì de 50.000.000, te si bon de fegurarte da numeri compagni?
Alora con pì transistori, e laorando pì inpresia, i computadori moderni xè boni laorar non sol con numari, ma anca scriver e far disegni in un kuadro (la tela), e col Windows, le robe le resta facile ke kualke mona dopera un makina così granda.
Come eli fati sti computadori?
Ben, i computadori noi xè fati sol de ste valvolete, ma le valvolete xè l cor del computador.
Sti ani, i computadori xera fati de valvole eletreghe, grande come un deo, ke le laorea a una tension granda a bastansa par copar na persona.
Ma co na mescola de Siliçio e Germanio, i scientisti xè stai boni de far na robeta picola, ke la fea l medeximo laoro dea valvola, ma la guastea manco luce, e xera manco pegra.
Un per de altri matunghi, i gà buo la idea de far "tolete" de sto material, e taiarlo, e conforme i taii, i fea i transistori un tacà laltro, parkè i laorese insime. Così xè saltada fora la posibilità de far un computador pal popolo.
Adeso, ste tolete xè taiae con laser, e i le impila in diversi piani. Ke i ciama de "çircuito integrà". Ke xè l cor del computador moderno, ke te sì drio doperar giusto adeso.
E con pì picoli i taii, pì inpresia la makina laora, pì numeri la maxena, e pì dificile de capirla la resta ...
Par doperar l Windows.
Pì avanti, parlaremo sora l Windows...
