Ola anonimo Cristian!
Credo ke te sipii bon de capir kuel ke te sì drio leder, se te sì bon de capir, alora credo ke te sipii un Veneto :)
Saveitu ke semo un dei popoli Ropèi pì antighi? No lè mia buxia nò! Ben, vanti l Impero Romano, l nostro popolo scrivea con un Alfabeto Runico come i Norvegi, ten piaxerisi mia de scriver anca ti con sto alfabeto dei Veneti Antighi? (sti Veneti Antighi xè ciamai "Venetiki", dai arkeologhi)
Alora te invito a inparar a scriver col Venetico. Fate avanti!
Mi gò catà due arkivi tea Internet coe letere del alfabeto Venetico:
Kuesti son i arkivi:
Mi volea na fonte Venetica par scriver robe in kalke posto, o adornar me logo tea Internet. Ma son mia stà bon de catar una fonte ttf, o pcb, o pfm, ... ke la gaese sto Alfabeto Venetico. Alora, la gò fata, e se te voli doperarla anca ti, struca kuà:
Fonte Venetica - Monospaxada 3.00 e Corsiva 1.50 - drita e sanca / sanca e drita
Vai avanti ledendo i me comenti par cognoser un poco depì del Venetico e saver come far la fonte laorar nel Windows ;)
Kuesta xè la correspondenxa dee letere Latine ae Venetike:
Baxà nei carateri del alfabeto, gò fato na fonte de 150 carateri, includi numeri, letere asentuae, simboli matematighi e altri simboli. Te poli veder tuta la taola de carateri in
kuesto arkivo.
Le peculiarità del Venetico, par scriverlo polito:
Te poli veder ke letere come F, E, K, o L le se par con kuele ke doperemo nel alfabeto Latino, ma le xè roverse. Kuesto lè par ke nel Venetico se scrive indrio cul, o sia, dea drita pala sanca (o destra pà sinistra se te piaxe depì). Vedi come resta l me soranome, fltrn:
- Nome sbalià, scrito da la sanca par la drita.
- Nome giusto, scrito daa drita par la sanca.
Ben adeso ke te sè ke se scominsia da la drita pala sanca, nea linea soto se fà da la sanca par la drita, come i Latini. Nea terxa linea te fè dea drita par la sanca nantra volta, nea coarta, dea sanca par la drita. De linea in linea ke te fè, te torni i carateri da na banda e laltra così:
l feltrin lè mato
parke l fa na mucia de robe stranie
ke nol sa se le xè bone in fato
almanco le serve par far rider ke far de manco
Porco bestia! Adeso ke te lo ghè cavà fora sto Alfabeto Venetico, te poli doperarlo anca ti. Se te voli saver un poco depì vanti scominsiar a scriver, alora scolteme kuà:
Da picinin mi gò inparà da me pupà ke l Veneto nol gà l *q*, e co cato un *qu* nee lengoe Latine, gò sempre da meter in so posto un *co* (o *ku* come i se fà ncoi). Cosita, te catarè scriti Veneti nel me logo senxa gnanca un *q* (ke lè una condixion giusta par scriver nel Venetico, ke nol gà l *q*).
Studiando un pò de Venetico, mi gò saesto ke se pol doperar l *i* in posto del *j*, e ke l *x* se lo dopera in medesimi posti del *x*. L son del *x* se lo fà con la letera someià al *M* Latino nel nostro Venetico. E l son del *k* lè medesimo del *c* con *a*, *o* o *u*. E i soni del *w* e *y* se li truca par *v* e *i*, co se ocor. Cato ke i soni dee letere Venetike xè i medeximi dea lengoa Veneta ke se dopera ncoi, par kuel polemo far correspondenxe.
L Venetico nol gà letere grande o picole, gnanca segnali grafiki ?!. No cognoso una anema viva ke la parle l Venetico, lè stà smentegà come l Etrusco o l Umbro. Alora dopararemo l nostro belo Alfabeto par scriver nea lengoa de ncoi. Come i Norvegi fà col so alfabeto Normando, femo col nostro e pronto!
Eco, skuaxi fenio! Gò fato due tipi de fonte: monospaxada, co le letere ke lè compagne dee originae Venetike, e corsiva, ke la xè pì bela, ma le letere xè un poketin diverse. Vanti far la fonte corsiva, gò proà veder come mi faria par scriver l Venetico senxa alxar la pena, alora gò fato le letere come le xè vegneste fora da me man. Le fonte xè libere de diriti de dupiegaxion e propietà inteletual (parkè sarà ke i gavarà inventà sti mestieri de propietà inteletual? par ciavarse nantre sbranke de skèi, sicuro.)
Come doperar la fonte:
- Se no te la ghè scargà là sù, scarghela adeso:
Fonte Venetica;
- Se te ghei arkivi dea fonte vanti coesto, te poli butarli via, parkè i xè veci, in so posto verde l arkivo *zip* ke te ghè scargà, nel c:\windows\fonts, o altro posto simile ke te ghè;
- Verdi l Word o kualke altro editor ke te ghè e proa doperar la fonte;
- Ghenè un per de segreti par far la fonte laorar polito: prima te ghè da verghene una tastiera (o teclado, o keyboard), internaxional e la lengoa Inglexa nel sistema. Lora te garantiso ke te sì bon da far vegner fora polito. Meti *`* (grave) e dopo l *a*, alora te capitarà un *à*, meti un *'* (apostrofo) e dopo l *i* e capitará l *í*. Par far l *ç* meti l *'* (apostrofo) e l *c*. E par far l *l* col baketo (ke non son bon da farlo vegner fora coà), te struki ctrl+alt+s, e saltarà fora sto *l* ke nol ghenè nea tastiera internaxional, ma ke lo gò adatà :)
- Comenti: Mi gò metesto i segnali grafiki, asenti e altri simboli nel arkivo dea fonte ke NOI XÈ parte del Venetico, par eser doperai par scriver come se scrive NCOI. Anca gò fato la fonte roversa, par le linee pari, la tua unica dificoltà sarà scriver indrio cul :) Penso da far un picolo editor de testo par meter a posto le letere, ma la ndarà meda longa vanti verghene tempo par sto mistier.
Ma la saria gnanca na bruta roba, inparar sta scrita Venetica senxa verghene una kualke roba da leder scrita col alfabeto antigo. Alora ghenò un per de poesie:
Poesia.
Par far pratica, gò metesto kà un toketo de un libro coa grafia Venetica, Latina e tradù al Inglexe:
